Translate

Translate

Translate

Translate

2012年9月19日 星期三

【TEDx Kowloon 準備 • 收集啟德小故事 】

作為閉幕講者同表演嘉賓,關注組好想同公眾講下啟德校園這遍土地上所發生過的趣聞趣事,傳言也好真人真事親身經歷也好,希望你地提供「啟德小故事」!

話說當年英國皇家空軍用啟德作為俱樂部,呢個歷史背景帶來左好多鬼故、傳奇;之後警隊一哥黎剪綵,又有偵緝訓練學校,令到呢個地方多一份令人幻想既魅力。 到咗藝術院進註,多左份青春氣息,有老師、有同學、有看更叔叔清潔嬸嬸,有突然探訪的街坊/遊客,呢份和諧中必定發生過好多鮮為人知既奇趣事!

唔好等喇,歡迎各位於PAGE內將一籮籮故事Inbox比我地,
或者電郵比我地 : kaitak2012@gmail.com

希望可以揀到你嘅故仔响台上同大家分享!

有問題請致電聯絡 : 69220218 (Amy)



2012年8月21日 星期二

視藝院再次於九龍塘迎新!


關注組於新生註冊日8月20日及8月21日都出現於九龍塘校舍,希望將最新進展帶比大家!

啟德尚未保留!同學仍需努力!! 



今次係為左視藝院長遠發展及百分百保留而籌款



聯署齊齊撐長遠保留啟德



新生義工向同學仔介紹啟德校園嘅鳳凰木,真係好靚!



今日有兩個外系新生黎左幫手!好落力,關注組陣容愈黎愈強大喇!加油加油!

   學聯成員一齊同關注組同學向各系師生講解啟德校園事件,多謝學聯成員支持!


新生新力軍!承傳好重要,我地一定會做足準備,打呢場持久戰,各位加油!

2012年8月12日 星期日

「藝術救藝術」啟德仲夏拍賣會


「藝術救藝術」啟德仲夏拍賣會圓滿結束
2012.8.12|「藝術救藝術」啟德仲夏拍賣會,視藝院上下仝人


啟德尚未保留  同學仍須努力

香港浸會大學視覺藝術院迫遷事件於周三(8月8日)出現轉機,政府突然軟化以特惠租金$5萬元續租予浸大(而非全屬視藝院)12個月,惟此後視藝院能否如舊百份百使用啟德校園尚是未知之數,迫遷事件12個月後可能重演。

由學生自發、獲本地業界及藝術家鼎力支持的「藝術救藝術」啟德仲夏拍賣會如期舉行,拍賣氣氛熱烈:現場拍賣22批藝術品總共籌得 $546,000,連同8批無聲拍賣及20批義賣藝術品,今次「藝術救藝術」啟德仲夏拍賣會一共籌得$683,550;連同師生陶器及明信片賣物,今日一共籌得善款$686,260!全數善款將用作全面保留啟德校園作視藝院教學用途,若成功爭取長遠保留啟德校園,餘款將捐予浸大視藝院作未來發展用途。

拍賣圖錄 
今日不少義捐作品的本地藝術家石家豪、黃國才、鄺鎮禧、何達鴻、管偉邦、尹麗娟、黃頌恩、余思鳴、鄧國騫、劉明進、陳中禧、吳家俊、楊沛鏗、李靜嫻、陳杰、陳翊朗、鄭家榆、鍾詠琪、封昊旻、何晉暐、黎朗生、黃曉楓、黃嘉榮、黃紹全、葉進杰、余迪文親臨現場支持。最高成交價拍賣品為視藝院老師何兆基博士的《手 — 視覺藝術院特別版》,拍得成交價75,000港元;競拍最熱烈為視藝院老師管偉邦作品《Seascape at Night》,以十二口價港元69,000成交。


周俊輝簽名支持永久保留啟德校園,作視藝校園教學之用。 
能於短短三周內成功籌辦是次拍賣會,全賴各界義工、本地藝術家、成員、同學、新生舊生的無私付出,關注組謹此致謝。關注組於8月9日與新總監John Aiken會面獲積極支持,今日Prof Aiken亦到場致開幕辭;惟浸大校長陳新滋今日並無出席,學生希望校長本月內就政府回信的不明之處向學生親自交代,共商未來長遠保留啟德校園作視藝院發展政策。


舊生楊沛鏗作品《Patient Practice》$16,000 成交

關注組特此感謝學聯支援音響器材、兩位義助的拍賣官 Jasmine Yan、黃英琦女士、各位業界人士的默默支持。這次創院以來首次由學生自發的拍賣活動,實令參與其中的同學獲益良多。我們希望傳承經驗,讓往後的學生都能日新又新,為本地視覺藝術界作貢獻。



一家大細來行行青草地,看看古建築,睇睇我地既藝術品

2012年7月30日 星期一

啟德校園九龍塘迎新生!




七月二十八日及三十日是視覺藝術系收生的大日子,除了見到一群視藝莘莘學子之外,
還接觸到很多其他系的學生,原來大家都有聽說過啟德校園的事,很高興也感動有大家的支持!




金城道入口今日好齊人!除咗有postcard, 我地仲有舊生親手雕咗好多啟德校園藝術作品嘅得意印仔,埋嚟扱返返幾個啦!



$5 / 2張,過嚟帶呢D咁靚嘅校園風景返屋企啦!



有心人非常支持!捐$100買晒成套postcard!


不少新生主動查問啟德校園事件,撐視藝人爭取保留啟德校
窩打老道、金城道兩個主入口擺檔,呢堆咁可愛嘅印仔係舊生自己雕o架!
係咪視藝人都歡迎你過嚟扱返個留念


驕陽下 VA人又發揮創意喇!!

呢兩日我地讓更多外系的同學仔了解左我地件事,希望你地可以繼續同身邊既人講,關注啟德!

2012年7月22日 星期日

[ 浸大視藝院 學生救校園 ] 大籌款旺角街頭賣藝籌款{第一炮}


{第一炮}722旺角街頭賣藝籌款!! 
7月22日(本周日),下午1-6時關注組成員於旺角西洋菜街行人專用區賣藝籌款, 同時向公眾講解啟德校園被逼搬遷一事!領匯式加租,藝術創作空間被壓迫是關乎大家的事!謝謝各方支持!!!

                                                                                                                                                          




      七一後啟德校園再現旺角街頭 ,  啟德校園和「半個車位的創作」準備就緒! 





浸大宗教及哲學系教授陳士齊到街站了解最新情況,支持學生今次走入群眾的活動,
捐款購買同學精心設計的POSTCARD.



組裝「半個車位的創作」 展示荒謬空間計算,無視學生安全。我哋將半個車位的空間重重現,罔顧學生人身安全 !!

Artwalk 創辦人 John Batten 今日行經街站,支持學生爭取保留啟德校園



在半個車位大小的空間,揼石、油畫、燒焊、玻璃共處一室,險象橫生 。 這次行為藝術吸引大量市民圍觀,主動查問啟德校園突然迫遷事件 。






出選體育,藝術及出版界功能組別的本地藝術家周俊輝,
本地藝術家魂遊
與學生公開討論啟德校園迫遷事件。
 





周俊輝:古蹟保育根本係一間大學應份做嘅,啟德校園呢個一級古蹟畀咗浸大做視藝院做校園,其實係個光環,仲要做得咁好,我睇唔到浸大有乜理由唔全力爭取保留啟德!教資會話無額外資源,你睇下演藝學院一年有幾億資助,視藝院從來都無!唔係視藝院要額外資源,而係教資會你由第一日起都未畀夠資源佢地!


本地藝術家魂遊:一個有歴史嘅地方,已經係一種無形嘅教育。你摸下舊石,入面有好多故事,而藝術學生就可以好好演繹出呢啲故事,用年輕嘅方式活化。





市民:點解浸大唔主動做嘢,攪到同學咁慘要自已爭取呢?



浸大視藝院學生將以公共藝術,向廣大市民講述啟德校園迫遷事件經過,並同場賣藝,為視藝院籌募一年租金(約600萬,先籌300萬再同步申請配對補助金),暫緩突然迫遷對教育質素的影響。這是八大院校中首個由學生自發籌錢租回自己學院的籌款活動!





視藝院的薄荷綠旗幟再現鬧市,關注組籌款第二炮即將來臨!!密切期待,如有機會,希望在街頭再見!

2012年7月16日 星期一

視藝院迫遷事件 與校董會主席面談


[蹉跎三個月王英偉始出現 文化界為視藝院站台]早上九時司徒薇與關注組成員到達藝發局。在關注組成立以來,經三個月不斷約見,浸大校董會主席兼香港藝術發展局局長王英偉先生終於首次與學生面談。


                                                                                                                                                     








黃英琦出席是次會議,重申支持保留啟德校園的立場,著重文化政策,並贊成學生保留整個校園繼續給視藝院使用。



黃英琦:視藝院啟德校園係咁多個活化古蹟之中,結合教學、社區藝術做得最好,係可以發展成為浸大招牌學院,點解王(英偉)校董你唔出力爭取保留呢?呢個係社會同傳媒對浸大嘅期望。我建議先續租整個校園一年比視藝院先,爭取討論空間。無論文化局成立與否,我嘅經驗容許我樂觀相信,用呢一年可以令保留啟德校園一事得到圓滿解決。



黃英琦:而家(外資設計學院)薩凡納又係問政府拎咗個古蹟,一蚊租十年,但收生收得好差攪得唔好;反觀浸大視藝院一年收生多過一年,又多人報、立法會都叫加開學額,咁浸大係好有空間去爭取有同等官方支持。試諗下一蚊十年,視藝院長遠可以培訓到幾多人才?呢個先可以配合西九文化局嘅發展方向。校方應該同學生企响同一陣線,咁先至可以爭取到創新政策。



司徒薇:浸大視藝院响結合文化與藝術方面做得最好,保留啟德校園我一定撐,呢件事上希望取得最好結果。對比其他大專院校,視藝院係全港浸大獨有,就好似理大有設計一樣,係一個不可多得嘅招牌學院,我睇唔到浸大有咩理由唔出力向政府爭取。呢個校園係可一不可再,浸大要珍惜。

關注組外務副主席許開嬌向王英偉解釋傳理視藝大樓不適用於視覺藝術院,當中包含太多不能接受的設計失誤。

許開嬌:傳理視藝大樓當初缺乏公開諮詢,現家起咗出嚟唔符合教學所需、甚至危及學生人身安全,呢啲問題總不能由學生承擔,校方亦應該反省點解可以錯成咁。新大樓嘅空間嚴重不足,又無開放公共空間,對創作造成極大局限。視藝院嘅教學同創作係同一件事,唔係有張枱、响個辦公室大樓入面上堂就可以教得好,藝術需要空間呢點,我希望校方明白。
























關注組成員鄭家樺向王英偉反映浸大主動跟進,刻不容緩。

鄭家樺:王英偉你身為校董會主席口口聲聲話支持保留啟德校園,點解到今日都唔主動去信政府產業署爭取特惠租金?而家我地學生已經行咗好多步,由學生出信(民政局、產業署)、聯絡立會同區議員、去信聯合國、向林鄭請願、七一遊行,我地嘅訴求已經好清晰,亦有廣大市民支持。下一步我地打算响旺角街頭賣藝、再响校園拍賣藝術品,籌款自求校園。到今日租期只係得返45日,浸大係咪仲要袖手旁觀





浸大校董會主席王英偉於面談中表示支持保留啟德校園但並無承諾會否去信要求政府繼續以特惠租金續租,並重提以藝發局分租六成啟德校園作中期暫緩。

王英偉:如果政府肯繼續用特惠租金長租啟德校園畀視藝院,浸大一定繼續租。我自己其實一直都好鍚視藝院,好想佢好好地繼續做,聯合國嗰個獎我有份攞返嚟。而家係睇政府資源支唔支持,如果林鄭月娥司長之前真係講過『一動不如一靜』,官方又有實質支持經常開支,我係完全支持視藝院留响啟德。

關注組成員會後向王英偉致送紀念品
(七一遊行收集聯署T-Shirt)。

2012年7月7日 星期六

七月七日掛心願 但願可以留啟德



 



七夕,是個紀念離別後可以重逄的日子。
啟德,雖然我們還未分離,但我們確切感受到失去了你將會承受的痛。

「別讓這一天到來。」

今天,很多關心啟德的人士都來到了這個地方,為這件事許下了點點的願望。竹上的小風鈴聲很是悅耳。


保安叔叔也許願。



我們不知道最後的結果,只知道當下要為保留這個地方做點事,那怕是一點點的小事。













What we want is AVA.
I Just wanna stay in AVA.

SAVE AVA!*